‘n Groot Plan van Verlossing
Melissa Fuller
Die lewe kan ons maklik oorweldig. Soms lyk dit of dinge goed gaan, en dan word ons getref met golf na golf van verlies, teleurstelling en pyn. Ons word voortdurend daaraan herinner dat ons in ’n gebroke wêreld leef en dat ons ’n Verlosser nodig het.
Maar ons God is groter as al die gebrokenheid wat ons ervaar. Hy het ’n groot plan van verlossing, ’n plan wat Hy by die skepping begin het en waaraan Hy vandag nog werk. God vertoon sy mag en soewereiniteit in die maniere waarop Hy sy plan van verlossing vir die wêreld en in elkeen van ons se lewens uitwerk. En, hoewel ons dit nie altyd kan sien nie, het ons dikwels die voorreg om te sien hoe Hy werk.
Te midde van God se oorkoepelende, uiters belangrike plan om verlossing in die wêreld te bring, het Hy genadiglik verlossing aan een vrou gebring. Elisabet het groot eer ervaar as die vrou van ’n priester en as regverdige beskou in die oë van God. Maar sy het ook groot pyn ervaar weens haar gebrokenheid. Tog het God haar uit al die vroue in Israel gekies. Hy het haar pyn, haar smagting en haar gebroke hart gesien. Hy het nie net vir Elisabet toegelaat om deel te wees van sy universele verlossingsplan nie, maar Hy het ook haar situasie verlos.
Behalwe vir die wonderwerk om ’n seun van haar eie te hê, het Elisabet nog ’n wonder beleef. Sy was die eerste persoon wat Jesus as die Messias bely het. Elisabet het nie net God se ongelooflike krag in haar eie lewe aanskou nie, maar sy het ook eerstehands die koms van die beloofde Messias gesien.
Aan die begin van die Evangelie van Lukas leer ons dat Johannes ’n voorloper van Christus was. Johannes was die profeet wat God belowe het om na sy volk te stuur om hulle harte voor te berei vir die koms van die Messias. Johannes was ’n belofte wat deur God aan die volk Israel vervul is, en sy geboorte was die voortsetting van God se grootse verlossingsplan.
Die evangelie van Lukas is ’n verslag van die lewe van Jesus, geskryf van een vriend na ’n ander. Lukas beskryf met duidelikheid en oortuiging wie Jesus is: die Seun van God en Seun van die mens, ten volle God en ten volle mens. Hy deel hoe Jesus sy mag en gesag vertoon het en hoe Hy die godsdiensleiers en hulle onderdrukkende stelsels uitgedaag het.
Maar binne sy groter doel met die skryf van hierdie Evangelie, vertoon Lukas die persoonlike maniere waarop Jesus sy mense sien, ken en vir hulle omgee. Jesus het dikwels dít waarmee Hy besig was, gestaak om die siekes, gestremdes en gemarginaliseerdes te genees, te versorg en aan te moedig. Die eerste gebeure wat Lukas opgeteken het, toon die maniere waarop God sy plan van verlossing deur Jesus sou bewerkstellig, maar dat Hy ook sy mense op baie persoonlike maniere sou verlos en herstel.
Ons sal oor en oor die Goddelikheid en menslikheid van Christus sien en die manier waarop Hy God se voornemens vervul het om ewige verlossing aan sy mense te bring. En soos ons dit doen, sal ons ook sien hoe God ons nooit miskyk nie, selfs in ons donkerste, mees desperate oomblikke. Hy gaan uit sy pad uit om te genees, te verlos en te herstel. Soos ons Jesus beter leer ken deur hierdie studie, laat ons afwagtend wees van die maniere waarop Hy sy verlossende en herstellende krag sal wys, selfs in ons eie lewens en omstandighede.
Week 1 Uitdaging:
Terwyl ons die Evangelie van Lukas bestudeer sal ons fokus op die godheid van Christus, die menslikheid van Christus en die manier waarop Jesus spesiale aandag gegee het aan die gemarginaliseerdes in die samelewing, insluitende die siekes, gestremdes, uitgeworpenes en vroue. Terwyl jy die dagstukkies lees, identifiseer hierdie drie: godheid, menslikheid en deernis in jou Bybel of joernaal. Merk of onderstreep elkeen met ‘n ander kleur sodat jy die manier kan sien hoe Lukas die karakter van Jesus deur sy Evangelie vertoon.
Week 1 Leesplan:
Week 1 Memoriseervers:
