Moenie Deur Leuens Mislei Word Nie
Deur Jen / 28 Augustus 2020 / Ken Die Liefde
Die briewe wat Johannes geskryf het, is geweldige intense briewe met baie diep leerstellings, waarskuwings, vermanings en aanmoedigings. Een van die redes hiervoor is dat, met die uitsondering van Johannes self, al die apostels reeds dood was. Hy was die laaste van die apostels, en daarom glo baie geleerdes dat die ‘laaste uur’ verwys na die einde van die apostoliese era. Baie mense glo ook dat die frase “laaste uur” verwys na die tyd tussen Jesus se opstanding en wederkoms. Ons leef in “die laaste uur.”
Een van die probleme wat die kerk gedurende hierdie tyd ondervind het, was valse leraars of ‘antichriste’. Dit verwys nie na daardie een figuur wat baie mag sal besit en baie mense sal mislei nie. Hier het die woord “antichriste” verwys na diegene wat leuens oor Jesus geleer het en dit met passie en oorreding gedoen het. Dit is wat ‘antichris’ beteken – teen Christus of die Messias – en in Johannes se tyd was daar meer as een. Die term ‘antichris’ word nie gebruik vir mense wat slegs ‘n paar klein dingetjies in hulle leer verkeerd het nie. Hierdie “antichriste” het dinge geleer wat heeltemal teenstrydig was met wat die Skrif geleer het oor wie Jesus is en wat Hy gedoen het.
Wat was sommige van die dinge wat hulle geleer het?
Hierdie valse leraars of ‘antichriste’ het baie dinge ontken, insluitend die godheid van Jesus. Hulle het nie geglo dat Hy die Verlosser en Redder van die wêreld is nie. Hulle het ook ontken dat Jesus van die Vader kom, maar in plaas daarvan ‘n geskape wese was. Sommige mense het geglo dat God die Vader nie die wêreld geskep het nie, maar dat engele het.
Wie is die leuenaar anders as hy wat nie wil erken dat Jesus werklik die Christus is nie? Hý is die antichris, hy wat nie die Vader en die Seun wil erken nie. – 1 Johannes 2:22
En elkeen wat dit nie van Jesus bely nie, het nie die Gees wat van God afkomstig is nie. Hy het die gees van die antichris, die gees van wie julle gehoor het dat hy kom en wat nou reeds in die wêreld is. – 1 Johannes 4:3
Daar het baie misleiers te voorskyn gekom in die wêreld. Hulle erken nie dat Jesus die Christus is wat mens geword het nie. Dit is wat ek met “die misleier”, “die antichris”, bedoel. – 2 Johannes 1:7
Ons kan ure gesels oor al die gevaarlike dinge wat hierdie mense geleer het, maar ons vind ook dieselfde in ons tyd. Mense wat godsdienstig is, ken al die regte woorde en leer iets gevaarliks, omdat dit strydig is met wat die Bybel eintlik sê. Dit klink miskien asof hulle weet waarvan hulle praat, maar hulle verkondig ‘n valse evangelie, een wat gevaarlik is, omdat dit keer dat mense na Jesus kyk as hulle hoop op verlossing.
Die manier waarop ons onsself kan beskerm teen dinamiese, welsprekede dog gevaarlike leraars, is deur ons Bybels te ken. Bewapen jouself met die waarheid!
Moenie blindelings volg wat ander sê nie, toets dit aan die Woord van God om seker te maak dat dit reg is. Moenie deur dwase of nuwe idees of valse leringe aangegryp word nie, hoe goed dit ook al voel. Ons gevoelens is nie altyd akkuraat nie en ons hart is bedrieglik en kan nie vertrou word nie.
Die hart is bedriegliker as enigiets anders, hy is ongeneeslik; wie kan hom verstaan? – Jeremia 17:9
Ken jou Bybel! Lees dit, bestudeer dit, bid daaroor, bespreek dit met ander en lees dit weer!
Hoe beter jy die waarheid ken, hoe makliker kan jy die leuen raaksien en standvastig bly in jou kennis en geloof in God.
Kyk Na Jesus,
