Liefde Vir Altyd en Ewig
Julie McIlhatton
Hierdie tyd van die jaar kan die beste in mense na vore bring. Ons dink aan ander, gee geskenke en streef daarna om mense te help wat eensaam of minder bevoorreg is. Dit kan egter ook ‘n tyd wees wanneer die lelik in ons na vore kom. Ouers baklei oor die laaste gewildste speelding van die jaar wat nog in die winkel beskikbaar is en argumente bars los oor parkeerplekke of in huise wanneer familie kom kuier.
Tydens die Kersgety kan geduld vinnig opraak. Ons wil hê ons kinders moet hulle mooi gedra wanneer ons familie besoek. Ons wil sou gou moontlik al die inkopies afgehandel. Ons smag na ‘n mooi foto van ons hele gesin – waar almal glimlag en terselfdertyd na die kamera kyk!
Hierdie blog is vir my ‘n ware uitdaging om te skryf, aangesien ‘n gebrek aan geduld een van my swakhede is. Ek bid dikwels vir meer geduld. Ek is selfs ongeduldig met myself as Christen, ek wil jaag om meer volwasse in my geloof te word, eerder as om deur jare van getroue gehoorsaamheid aan die Here deur die wel en wee van die lewe te gaan.
Ek besef dat my ongeduld dikwels spruit uit ‘n oordrewe idee van hoeveel ek op een dag gedoen kan kry. Maar eintlik is die kern van die saak en die sonde van my ongeduld ‘n begeerte dat dinge my gang moet gaan eerder as om te vertrou dat God se weg die beste is!
In Psalm 103 word ons aangemoedig om die Here te loof terwyl ons herinner word aan ons Hemelse Vader se vriendelike dade, deernis, barmhartigheid en wonderlike geduld teenoor ons. Dit spruit uit sy groot en lojale liefde vir ons. God se liefde is nimmereindigend, dit gee nooit moed op nie, is nooit gebroke nie en hou vir altyd en ewig aan!
God wys vir ons die omvang van sy liefde in vers 11, terwyl sy standvastige liefde soos die hemel oor ons uittroon. Ek is mal daaroor om in die lug op te kyk en te sien hoe die wolke beweeg, maar op ‘n helder nag is dit selfs meer skouspelagtig. As jy van die stadsliggies kan wegkom, is die aantal sterre werklik asemrowend. Dit herinner ons hoe groot die skepping is. Dit is ‘n prentjie van hoe God se standvastige liefde vir ons oorheersend oor ons uittroon. Wonderlik!
Gelukkig handel die Here nie met ons volgens dit wat ons sondes verdien nie. In plaas daarvan, as gevolg van Christus se gehoorsaamheid om mens te word en ons plaasvervanger aan die kruis te wees, word ons uit die put gelig. God kroon ons met sy lojale liefde en deernis en verwyder ons sondes so ver as die ooste van die weste is – dit is onmeetbaar ver! Wat ‘n groot genade!
Dit is nie dat God onbewus is van hoe sleg ons is nie. Hy ken ons ten volle. Dit is nie eers dat Hy Hom blind hou vir ons sondes nie. Hy sien alles. Hy kon kwaad bly en ons beskuldig en ons van sy heilige teenwoordigheid weerhou. Maar Hy kies liefde, barmhartigheid en deernis – Hy betaal die skuld vir ons sonde en is geduldig met ons, selfs wanneer ons keer op keer val. Ek moet myself daaraan herinner wanneer my geduld met my sondigheid op is!
Dit is egter nie vir ons ‘n verskoning om aan te hou sondig en te dink dat die Here geduldig sal wees en ons vergewe, so wat maak dit regtig saak nie? (Sien Romeine 6:1-11). As Christene is ons verenig met Christus! Die Heilige Gees maak ons oë oop om ons sonde raak te sien en ons word so getransformeer deur God se wonderlike liefde vir ons dat dit die begeerte van ons harte verander. Ons wil sy liefdesverbond nakom en sy opdragte gehoorsaam – om kragtige vegters van God te wees! Dit laat ons uitstaan in die wêreld, wys ander na die bron van dit alles en bring eer aan die Here. Die verskil is duidelik en pragtig.
Terwyl ons onsself herinner aan die groot liefde, barmhartigheid en geduld wat God aan ons bewys het, word ons in staat gestel om dit aan die wêreld om ons te weerspieël. Mag ons hierdie Kersfees, terwyl ons oral heen rondjaag, tyd neem om die liefde, barmhartigheid en geduld van die Here te weerspieël aan diegene met wie ons skouer skuur en langs die pad ontmoet.
