Konstante Gebed
Cristin Tippin
Nehemia het vier maande lank gebid. In hartseer en ellende het Hy God se vertroosting gesoek. Hy het gebid vir God se vergifnis en genade vir sy mense. Hy het God se getrouheid en die beloftes wat Hy gemaak het, onthou. Hy het vier maande in diepe gebed deurgebring, maar in die oomblikke voordat hy ‘n versoek gerig het aan ‘n koning wat nie Nehemia se God gedien het nie, het hy weer gebid en God het geantwoord met ‘n ongelooflike openbaring van sy getrouheid en guns vir Nehemia.
Ek is mal oor Nehemia se voorbeeld van spontane gebed. Nehemia het gewys hoe om ‘n man van God te wees wat nie beperk is tot gebed tydens sy daaglikse “stiltetye” of net voor hy snags aan die slaap raak nie, maar eerder een wat Paulus se opdrag aan gelowiges illustreer om sonder ophou te bid (1 Tessalonisense 5:17). Nehemia wys vir ons die intimiteit van sy verhouding met God deur hierdie kort oomblik van gebed.
Ek het eenkeer gehoor hoe ‘n predikant sy gemeente vra hoe ‘n verhouding met ‘n huweliksmaat sal wees as hulle net een of twee keer per dag met mekaar praat. Miskien net een keer in die oggend of saans. Wat as ons nie deur die loop van die dag kort oomblikke van gesprek met hulle gedeel het nie, maar eerder net aan hulle gerapporteer het hoe ons dag verloop het en wat ons van hulle nodig het? Ek was nie op daardie stadium getroud nie, maar dit was vir my maklik om te sien hoe moeilik dit kan wees.
Wanneer ons voortdurend tot ons God bid, ervaar ons diepte in ons verhouding met Hom wat ons dalk nie anders kan ervaar nie. Nie net dit nie, wanneer ons soos Nehemia ‘n oomblik neem om te bid voor ons praat, voor ons by ‘n kamer instap, terwyl ons in die middel van ‘n angstige gesprek is, ervaar ons God se guns. God gee ons deur die krag van die Heilige Gees wysheid en woorde om te spreek. Hy maak die harte van diegene rondom ons sag. Hy gee ons die moed en die vrymoedigheid wat ons nodig het. Hy bring vrede en kalmte in ons angstige harte.
God begeer dat ons daagliks en voortdurend met Hom sal praat en om in enige en elke oomblik op Hom te steun. Vriende, God is ‘n toeganklike God. Nehemia het dit geweet. Geen privaat kamer of geen rituele is nodig nie. Hy het geweet dat God sy gebed sou verhoor en het Hom vertrou om op daardie oomblik in sy behoeftes te voorsien. Dieselfde geld vandag vir ons.
Ons belê in die diepte en intimiteit van ons verhouding met God wanneer ons tyd in beide diepe gebed en spontane gebed spandeer saam met Hom. Hoe meer my dae vol is van beide tipe gebede, hoe meer kan ek verseker wees dat die “goeie hand van my God op my is” (Nehemia 1:8).
