Jy het ‘n getroue vriend
Een van my gunsteling trefferliedjies van alle tye is “You’ve Got a Friend” van James Taylor. As die ballade oor die radio kom, draai ek dadelik die klank harder en begin saamsing. Ek hou van die lirieke, maar die waarheid van daardie woorde het in my lewe nie altyd waar gebly nie. Ek wens ek kon net letterlik my oë toemaak en aan ‘n vriend dink as ek benoud is, en dan sien hoe iemand aangehardloop kom om my ‘n helpende hand te gee.
Dit is ‘n goeie teorie, maar ‘n onredelike verwagting. Die waarheid is dat ek soms ‘n vriendin bel om my die antwoord op my probleme te gee, en ‘n uitgeputte vrou stuur vir my twee dae later ‘n antwoord. My vriende het siek kleuters, ouer ouers en baie wasgoed. Ek is nie die enigste persoon wat oorweldig word deur probleme nie.
En om die waarheid te sê, laat ons eerlik wees, sommige vriende is wonderlik tydens koffie-afsprake en karaoke-partytjies, maar as jy skielik nie meer die lewe van die partytjie is nie, weet hulle nie hoe hulle jou hartseer moet hanteer nie. Die altyd vrolike sonskynmense kan nie al die skielike reën hanteer nie, en daarom kies hulle om niks te sê of daag selfs nie eers met ‘n sambreel op nie. As jy deur ‘n seisoen van droefheid stap, leer jy dat sommige mense net mooiweers vriende is.
Het jy hierdie hartseer les geleer? Miskien het jy op iemand gereken om jou te help om die stukke op te tel, en jy het in die proses net meer pyn bygekry. Vriendin, die Here Jesus weet hoe jy voel. Hy het ‘n wrede dood aan die kruis gesterf, en al sy vriende het gevlug. Niemand verstaan verraad en verlies meer as ons Verlosser nie. Jy kan jou teleurstelling met Hom deel en vertrou dat Hy op jou trane let (Psalm 56: 9).
Jy het ‘n getroue vriend in Jesus. Hy sal jou nooit verlaat nie. Jy kan met vertroue sê: ‘Die Here is my helper, en ek ken geen vrees nie. Wat kan ‘n mens aan my doen?” (Hebreërs 13:6) Jou opofferende Verlosser is nooit te besig om in jou behoeftes te voorsien nie. Hy kan jou moeilike omstandighede hanteer, en Hy sal altyd lewe oor jou uitspreek.
Jesus sal vir ewig daardie ware vriend wees wat ‘nader is as ‘n broer’ (Spreuke 18:24). Jy kan sy magtige naam op hierdie oomblik uitroep, waar jy ook al is, en vertrou dat Hy by jou is. Winter, lente, somer of herfs, al wat jy hoef te doen is om te roep. Jou Helper sal verseker kom met sy troos om selfs jou donkerste nag te verlig.
