Hoop in die Kruis van Christus
Grace Ann Hopkins
Soms kan ek nie help om te wonder hoekom God nie alle gebede op dieselfde manier beantwoord nie. Ek wonder hoekom een van my gebede dieselfde dag beantwoord word en tog is daar ander wat vir lang periodes onbeantwoord bly. Ek het besef dat God se tyd nie my tyd is nie. Hy het ‘n ander perspektief as ek; ek kan nie altyd sien hoe God werk nie, Hy sê dat Hy altyd aan die werk is (Johannes 5:17).
Een van die mooi dinge van God is dat Hy ons vrae en ons ongeduld verstaan, want Hy is die Een wat ons gemaak het. Psalm 103:14 sê God weet waarvan ons gemaak is, Hy hou in gedagte dan ons net mense is, uit stof gemaak. Hebreërs 4:15 sê dat Jesus empatie met ons kan hê, omdat Hy weet hoe dit is om mens te wees. God besef ons onvermoë om sy weë te verstaan, maar deur sy Gees stel Hy ons genadiglik in staat om sy natuur beter te verstaan hoe meer ons tyd in sy teenwoordigheid spandeer.
Het jy al ‘n tyd beleef toe jy God soortgelyke vrae gevra het? Vriendin, ek weet nie waardeur jy gaan nie, maar ek wil jou gevoelens erken, omdat dit werklik is vir jou. Ek wil egter ook die waarheid van Jesus oor jou situasie spreek en vir jou ‘n rede gee om te hoop, selfs te midde van pyn, stryd en beproewing. Die God wat ons ken en dien, het sy volle aandag op jou en gee dieper om vir jou as wat enige mens ooit kan. Hy wil tyd met jou spandeer met die waarheid van sy Woord wat beloof om jou vry te maak (Johannes 8:32).
Romeine 5 herinner ons aan die krag van die evangelie. Paulus begin hierdie hoofstuk deur te verduidelik dat, as gevolg van wat Christus vir ons aan die kruis gedoen het, ons volkome regverdig verklaar word wanneer ons ons geloof in Hom plaas. Ons staan nie meer in ons verlede of ons skaamte nie, maar ons staan vas in God se genade deur die bloed van Jesus (Romeine 5:1-2).
Eerder as om toe te laat dat ons omstandighede ons definieer, het ons die geleentheid om ons te verheug in die hoop op ‘n ewige toekoms saam met God. In Christus het ons die bonatuurlike krag om ons te verheug in ons aardse lyding terwyl dit ons versterk, laat groei en ons toelaat om ons gedagtes te vestig op die hoop wat ons in Christus het (Romeine 5:3–4). God het ons so liefgehad dat Hy sy Seun vir ons geoffer het toe ons nog gesondig het, van Hom weggehardloop en ons aangesig vir Hom verberg het (Romeine 5:6–8).
Dit is die eenvoudige en tog wonderlike rede waarom ons altyd verheug kan wees, want Christus het ons lewens gered en ons vriendskap met God herstel deur middel van sy bloed (Romeine 5:11). Jesus is die Weg waardeur ons ons steeds kan verheug in die stryd, die Waarheid waarop ons staan wanneer die vyand leuens na ons kant toe gooi, en die Lewe wat ons elke dag kan ontvang (Johannes 14:6).
Ek bid dat jy sal besef hoe baie God vir jou omgee en hoe Hy saam met jou stap deur hierdie huidige seisoen. Die bewys hiervan is in sy bloed wat vir jou gestort is toe jy dit die minste verdien het. O, hoe het Hy jou die moeite werd geag.
Onlangs het ek desperaat gebid vir iemand baie na aan my en ek het nog nie die volkome genesing gesien wat ek verlang om te sien God in hulle lewe bring nie. Maar selfs terwyl ek wag dat my gebede beantwoord word, (alhoewel die Here dit selfs nou kan beantwoord op maniere wat ek nog nie heeltemal kan sien nie), laat God se karakter my toe om my te verheug. Dis omdat sy karakter standvastig is selfs wanneer my omstandighede nie is nie.
Aangesien ek my geloof in Jesus geplaas het, leef ek in die versekering dat hierdie sondige wêreld nie my tuiste is nie. Ek het iemand wat vooruit gegaan het om vir my ‘n plek te berei, en sy naam is Jesus (Johannes 14:1–4).
Ek bid dat ons sal groei om die perspektief van Jesus te hê: Hy wat in die gestalte van God was, het sy bestaan op Godgelyke wyse nie beskou as iets waaraan Hy Hom moes vasklem nie, maar dat Hy aarde toe gekom het om ‘n dienskneg te wees (Filippense 2:6–8); wat vasberade sy weg na Jerusalem gebaan het om sy liefdes-sending te voltooi (Lukas 9:51); wat gepleit het dat die beker by Hom verbygaan in die tuin van Getsemane, maar helaas vir God gesê het: “Laat u wil geskied” (Matteus 26:42); wat in die teenwoordigheid van sy oortreders gesê het: “Vergewe hulle, want hulle weet nie wat hulle doen nie” (Lukas 23:34).
Jesus het nooit sy fokus of sy doel uit die oog verloor nie. Mag ons ywerig ons oë op Hom vestig en sy gesindheid en vasberadenheid hê terwyl ons op hierdie aarde wandel (Hebreërs 12:2-3). Mag ons die diepe perspektief van Jesus ontwikkel, wat vir sy dissipels gesê het om nie te vrees nie, al sou hulle dit inderdaad moeilik hê, want God het reeds die wêreld oorwin (Johannes 16:33).
Vriendin, in Christus het jy die denke van Christus ontvang, en jy het die vermoë om jou oë te vestig op wat jy nie kan sien nie, eerder as op wat jy sien. Mag jy die dinge van die hemel bedink en kies om jouself te herinner aan die hoop wat ons het om eendag saam met Christus op te staan en vir ewig in sy woning van volmaaktheid te woon.
Week 3 Uitdaging:
Ons tema vir hierdie week is om met vrymoedigheid te bid. Is daar iets in jou lewe wat vrymoedige gebed benodig? Hoe kan jy ‘n geloofstap neem en jou gebedsversoeke met vrymoedigheid na God te neem?
Week 3 Leesplan:
Week 3 Memoriseervers:
