Helm van Verlossing
Ebos
Hierdie week se deel van die wapenrusting is die helm van verlossing. Hoofbeserings kan dodelik wees, dus as soldate na die gevegsfront gaan, beskerm ‘n helm hul koppe en hul breine, wat die kragbron van die hele liggaam is.
Sodra die duiwel ‘n houvas op ons verstand en ons gedagtes kry en dit manipuleer, dan het hy ons. Oorloë het al begin omdat mense ander breinspoel of omdat hulle gebreinspoel is. Koninkryke en dinastieë het verkrummel as gevolg van ‘n gedagte wat geplant is en ontkiem het. ‘n Persoon word beheer deur dít wat die troon van hul gedagtes beklee. Die moeilikste gevegte om te wen is dié wat op die slagveld van die verstand geveg word. As ‘n stryd in die gedagtes gewen word, word dit aan die buitekant gewen. As die duiwel voortdurend oorlog kan voer en ‘n persoon se gedagtes en verstand kan beheer, word hulle verslaan.
‘n Persoon wat nog nie hulself aan Christus oorgegee het nie, sal voortdurend toegee aan die planne van die vyand. Die duiwel sal aanhou om hulle gedagtes te pynig met allerhande kwaad. Ek onthou ‘n tyd toe ek deur Satan in my gedagtes gepynig is. Ek was uitgeput. Ek wou vrede hê. Ek was so bang vir my gedagtes, totdat God my verlos het. Ek onthou hoe ek eendag gebid het en gesê het, “Vader, watter stryd ek ook al in my gedagtes moet veg, mag U altyd wen.” Ons Goeie Vader het toe gewen en wen steeds.
Die duiwel is ons teëstander wat mislei en lieg. Hy sal voortgaan om ‘n persoon se gedagtes te voed met ondergang, mislukking, hul magteloosheid en hul tekortkominge. Hy wil altyd ons koppe vul met soveel leuens dat ons voel of ons in alle rigtings getrek word.
Ons kan net hierdie stryd wen deur ‘n hernieude gemoed te hê. ‘n Hernude verstand kom deur voortdurend en bewustelik ons gedagtes te vul en te voed met die waarheid: God se Woord. Wanneer die duiwel met sy bedrog en leuens kom, is ons verdediging seker.
God het sy groot werk in my lewe gedoen en een van die maniere was om my te seën met ‘n onversadigbare honger na sy Woord. Ek het die woord “seën” gebruik omdat dit ‘n groot seën is om die voortdurende begeerte te hê om God se Woord te lees en te bestudeer. Iemand wat voortdurend na God se Woord smag, is nooit ver van God af nie.
Hoe meer ons God se Woord lees en dit gehoorsaam, hoe meer word ons gedagtes verander en vernuwe om op God te fokus. Wanneer ons fokus op God en sy regverdigheid is, is dit ‘n wapen wat ons beskerm teen die planne van die duiwel wanneer hulle kom.
