God se Woord is Waar
Grace Ann Hopkins
Die Gawe van die Woord
Dit was besonders om Jeremia 29 en die omliggende Bybelgedeeltes te bestudeer. Terwyl ek gelees het, moes ek stop en God dank vir sy Woord. Die feit dat ons die Woord van God het om na toe te draai, sy eie asem, is ‘n wonderwerk. Ek moet erken dat ek nie gereeld genoeg my toevlug neem na sy Woord nie. Daarin vind ons lewe, vrede, hoop, vreugde en vryheid. Waarlik, om die Woord te lees, is om by Jesus Christus self te sit, wie die Woord is (Joh. 1:1). Ek word diep bemoedig deur die Gees van God om meer en meer in die Woord te vertoef. Mag ons nie so maklik afgelei word dat ons uitmis op sulke kosbare tyd saam met die HERE, wat ons gemaak het en ons liefhet.
Ek is seker baie van ons het al Jeremia 29:11 aangehaal gehoor. Wat ‘n pragtige belofte is dit nie. Dit word egter dikwels uit sy konteks geneem. Wanneer ‘n Skrif nie in sy regte konteks gelees word nie, verstaan en waardeer ons nie God se hart vir ons ten volle nie. Dit help altyd vir my om die geheel van ‘n toegewysde gedeelte asook die verse voor en daarna te lees. Wanneer ons dus vers 11 lees, laat ons ook vers 10 en verse 12-14 insluit. Ek is opgewonde vir jou en vir my om te sien wie God is deur hierdie gedeelte. Die Bybel is immers God wat aan jou oordra wie Hy is. Hy is nie vir jou verborge nie, maar smag desperaat daarna dat jy Hom moet ken!
God se Karakter word Vertoon
Vers 10 vertel vir ons dat God se volk na Babilon verban is. Dit is as gevolg van hulle ongehoorsaamheid aan God. Dit sê ook vir ons dat God nie van plan was dat sy volk vir ewig daar moes bly nie. Hy maak ‘n belofte dat Hy hulle oor 70 jaar sal terugbring huis toe. En dan weerspieël vers 11 pragtig God se sorg en genade. God ken sy volk en het ‘n plan om hulle te red. Ten slotte, in verse 12-14, spreek God sy begeerte vir sy volk uit. Hy sê vir hulle dat Hy by hulle sal wees in hulle ballingskap en belowe om hulle op die regte tyd ten volle te herstel.
In hierdie gedeelte word beide God se oordeel en God se liefde gemanifesteer. God is regverdig, volmaak en heilig. Hy is bo alles en verag sonde. Daarom moet sonde gestraf word. In hierdie gedeelte word die volk se sonde gestraf deur ballingskap uit die Beloofde Land. Tog word God se liefde vertoon deur sy belofte om hulle ten volle te herstel en terug te bring na die land wat Hy aan hulle gegee het. Dit is die diepe genade van God.
God Vervul Sy Beloftes
Terwyl ek oor hierdie gedeelte nadink, kan ek nie anders as om te dink aan Jesus se offer aan die kruis, waarin beide God se oordeel en liefde ten volle vertoon word nie. Aan die kruis was Christus die offer vir alle sonde, vir alle tye – Hy het die volle oordeel van God namens ons op Homself geneem. Nou moet ons eenvoudig in Jesus glo en ons geloof in Hom plaas, en ons sondes is vergewe. Prys God! Ek het werklik nie woorde om te beskryf hoe diep die Vader se liefde vir ons is nie – hoe magtig en eindeloos sy genade teenoor ons is.
Ek moet jou los met ‘n rede waarom jy God se belofte kan vertrou. Neem ‘n oomblik om Esra 1:3 en 2:1 te lees. Hier word God se volk uit hulle ballingskap bevry en na hulle huise in Jerusalem en Juda teruggebring. Inderdaad, Jeremia 29 is vervul. Hoekom? Omdat God sy beloftes nakom. Altyd. Sy Woord is waar. Ons kan en ons moet ons lewens op sy Woord bou, want dit sal ons na God lei in ‘n wêreld wat ons op ‘n dwaalspoor lei.
Vriendin, dit maak nie saak waardeur jy gaan nie, God is in staat om jou heeltemal te herstel (1 Petrus 5:10). Niks is vir Hom te moeilik nie (Jeremia 32:27). Roep Hom aan. Bid tot Hom. Soek Hom. Hy hoor jou. Jy sal Hom vind, en Hy sal jou herstel.
