Die Gawe van Geloof
Sara Lindsey
Lank gelede het ‘n jonger weergawe van myself in ’n geskenkwinkel in ‘n hospitaal in Dallas, Texas gestaan en ’n klein gedenkplaat gekoop waarop hierdie vers gegraveer was:
“Om te glo, is om seker te wees van die dinge wat ons hoop, om oortuig te wees van die dinge wat ons nie sien nie.” Hebreërs 11:1
Na baie beraadslaging, onderhoude regoor die land, ‘n verandering in my area van spesialisering en die familiebesigheid wat in ’n ander dorp was, het ons die besluit geneem dat hierdie die beste plek vir my was om my residensie te doen. Dit was ’n besluit wat geneem is na baie gebede, en ons het God se leiding en voorsienigheid ervaar om by daardie besluit, by daardie plek uit te kom. Dit was ’n stap van geloof.
Ek het die gedenkplaat al die jare gehou en ek dink gereeld aan hierdie vers.
Geloof is die hoeksteen en die spilpunt van die Christenskap. Dit is terselfdertyd noodsaaklik, maar moeilik om te verduidelik. Ek kan nie vir jou my geloof wys met ’n video op sosiale media of ’n Excel-sigblad nie. Ek kan nie jou geloof vir jou bou of koop nie.
Hoe weet ek dat die tandemuis en God nie deel is van dieselfde sprokieswêreld vir kinders nie? Wel, ek was een. En ek het probeer – en misluk – om die ander te wees.
Dis soos liefde. Of swaartekrag. Ek kan dit nie vashou nie. Ek kan dit nie letterlik sien nie. Maar ek kan nie ontken dat dit werklik is nie. Ek het God by tye bevraagteken, en Hy was genadig om Homself herhaaldelik aan my te openbaar. Twyfel is nie noodwendig die vyand van geloof nie. Dit is wonderlik om die Sondagskoolantwoorde te ken, maar soms kan vrae, twyfel en ongeloof jou dieper laat delf en langer laat worstel, totdat jy ’n vaste geloof van jou eie bou.
So, hoekom het ek geloof? Hoe weet ek God is werklik?
Daar is ’n hele wêreld van Christelike apologetiek wat die Christelike geloof verdedig en bewys. Daar is historiese bewyse van Bybelse profesieë wat tot vervulling gekom het. Daar is ongeëwenaarde historiese bewaring van die Bybel. Die wetenskaplike, letterlike kant van my hou van sterk bewyse.
Daar is ook ’n kant van my wat in God glo en geloof het as gevolg van wat ek ervaar het.
Ek weet dit aan die vryheid wat ek gevoel het toe ek vir Jesus gevra het om in my hart te kom, en hoe my skuldgevoelens en my skaamte weggerol het.
Ek het dit aanskou in gebede wat verhoor is.
Ek sien dit in die genade van ’n nuwe dag en die skoonheid van ’n sonsondergang.
Ek is daardeur onderhou tydens ‘n storm toe ek ineen wou stort, maar die dam in my het nie gebreek nie.
Ek het dit vasgehou in my reënboogbabas wat gebore is ná verlies.
Ek het in hospitaalsale gestaan waar mense onoorleefbaar dinge oorleef het.
C.S. Lewis het dit goed opgesom toe hy geskryf het, “Ek glo in Christenskap soos ek glo dat die son opgekom het: nie net omdat ek dit sien nie, maar omdat ek daardeur alles sien.”
Week 4 Uitdaging:
Neem hierdie week tyd om na te dink oor die gawe van geloof. Hoe is geloof ‘n gawe? Op watter maniere was jou geloof ‘n gawe in jou lewe? Hoe kan jy seker wees van jou geloof as jy nie Wie jy in glo, kan sien nie?
Week 4 Leesplan:
Week 4 Memoriseervers:
