Die Evangelie Verander Alles
Emily Hope
Gedurende my kinderjare het my ouers ‘n paar frases gehad wat hulle herhaal het. Een wat my ma gereeld gebruik het, was: “Daar is nooit ‘n rede om onvriendelik te wees nie.” As tiener het ek hierdie herhaalde refrein irriterend gevind, maar ek het die waarde daarvan besef (selfs al wou ek dit nie erken nie). My ouers het hierdie sêgoed herhaal omdat hulle wou hê ons moet dit onthou. Hulle het gedink hierdie woorde is so belangrik dat hulle nie wou hê ek moet dit vergeet nie.
Meer as herinneringe om vriendelik te wees of om my maniere te gebruik wanneer ek met ander praat, is die woorde van die evangelie die belangrikste woorde om te onthou. Dwarsdeur ons lewens moet ons herinner word aan die waarheid van die verlossing wat in Jesus Christus gevind word. Dit is die evangelie wat ons lewe, hoop en vryheid gee.
Die Waarheid van die Evangelie
As jy wonder wat die evangelie is en waarom dit saak maak, wil ek dit graag met jou deel. In die begin het God man en vrou na sy beeld geskep. Hulle het in perfekte harmonie met God geleef. Een dag het die slang Eva versoek om van die een boom wat in die Tuin van Eden verbode was, te eet. Dit was in hierdie oomblik dat Eva begin het om God se goedheid in twyfel te trek en probeer het om die een in beheer van haar lewe te wees. Beide sy en haar man Adam het God se opdrag oortree. Hierdie aksie het sonde in die wêreld ingebring, en dit is ‘n probleem vir elke mens sedertdien. Sonde is enigiets wat ons dink, sê, of doen wat nie God behaag of eer nie.
Ons is almal sondaars. Die straf wat ons verdien is die dood en skeiding van God. Daar is niks wat ons kan doen om ons sonde reg te maak nie. Maar God, wat ryk is in genade en liefde, het ‘n manier geskep vir ons om vergewe te word en in ‘n regte verhouding met Hom herstel te word. God het sy eie Seun, Jesus Christus, gestuur om die straf wat ons vir ons sonde verdien, op Hom te neem.
Jesus het die lewe geleef wat ons nie kon nie, een van sondeloosheid en perfekte gehoorsaamheid. Hy is onregverdig aangekla en is gevonnis en gekruisig aan ‘n Romeinse kruis. Hy het gesterf en is begrawe. Drie dae later het Hy oorwinnaar uit die graf opgestaan. As die volmaakte Seun van God, het sy dood, begrafnis en opstanding die sonde en die dood oorwin en is dit voldoende om alle sondes van mense in die verlede, hede en toekoms te bedek.
Jesus sê vir ons dat as ons met ons monde bely dat Hy die Here is en in ons harte glo dat God Hom uit die dood opgewek het, dan sal ons gered word (Romeine 10:9-10). Verlossing is deur genade alleen, deur geloof alleen, in Christus alleen. Wanneer ons, ons geloof in Jesus plaas, word ons onmiddellik van ons sondes vergewe. Ons gaan oor van die dood na die lewe en word gevul met die Heilige Gees om op ‘n manier te leef wat Christus behaag en eer. As jy nog nooit in Christus vertrou het vir jou verlossing nie, wil ons graag met jou gesels. E-pos [email protected].
Die evangelie verander alles.
‘n Evangelie-gesentreerde Huis
‘n Evangelie-gesentreerde huis is een waar waarheid verkondig word, genade herhaaldelik aangebied word, en Jesus die middelpunt en held van alles is. Wanneer jou kind sukkel om sy of haar waarde te onthou, is die waarheid dat Jesus hom of haar gekies het, die belangrikste woorde om te hoor. Wanneer jou kind die reëls vir die tiende keer vandag breek, herinner hom of haar dat God ons grense gee sodat ons kan floreer, en bring hulle terug na die evangelie.
In alle areas van die lewe kan ons die vraag vra: “Wat sê die evangelie daaroor?” Dit is deur genade dat ons gered is, en dit is deur genade dat ons deur geloof kan leef. Hoe het die evangelie jou lewe verander? Hoe kan dit begin om jou huis te verander?
