Wat Regtig Saak Maak
Grace Ann Hopkins
My gunsteling oomblikke op hierdie aarde behels altyd twee dinge: mense en drukkies. Dit is asof die tye wanneer ek omhels word of die tye wat ek ander ‘n drukkie kan gee, oomblikke is waarin tyd stop en God my herinner aan wat werklik saak maak. Ek moet erken, ek het dikwels daardie herinnering nodig; ek raak bekommerd oor hoe ek lyk, hoeveel titels ek agter my naam het en of daardie titels vir die wêreld belangrik is. Ek raak behep met hoe die toekoms sal lyk, en ek raak jaloers op diegene wat blykbaar meer as ek het. Wanneer ek hierdie ingesteldheid het, is ek kwaad, hartseer, angstig en voel ek waardeloos.
“Onthou die waarheid,” sê ek vir myself wanneer ek besef wat dit aan ons doen om op sulke niksseggende dinge te fokus. Want ek weet waarlik, diep binne, dat net een ding saak maak, en dit is liefde.
Ek glo dat een van die vyand se grootste instrumente teen ons, apatie is. Dit is geen geheim dat dit soveel mense se gedagtes deur sosiale media of ander vorme van vermaak op die oppervlakkige en tydelike vasgevang het nie. Dit is hartseer om te sien hoeveel lewens dit gesteel het deur die leuens dat iemand nie “mooi genoeg”, “goed genoeg” of “gewild genoeg” is nie.
Daar was ‘n tyd in my lewe waar ek amper my waarde heeltemal uit die oog verloor het. Ek het so sonder hoop en alleen gevoel dat ek begin oorweeg het hoe die wêreld sou wees sonder my daarin. Ek het begin glo dat as ek weggaan, mense nie eens sal agterkom ek is weg nie. Mense was lief vir my en het vir my omgegee, maar ek kon dit nie sien nie; ek het gekies om alleen te veg weens die leuen, “jy is ‘n las”. Ek dank die Here dat Hy my gered het uit die put waarin ek was en dat Hy my herinner het aan my waarde vanweë sy opoffering. Nou is daar niks wat my meer hartseer maak as wanneer mense blind is vir die waarheid van hoeveel hul lewens saak maak en hoe geliefd hulle is nie.
Waarlik, vriendin, jou lewe beinvloed so baie, en daar sou ‘n leemte in baie harte wees as jy nie hier was nie. Dink daaroor: wanneer jy een persoon liefhet, voel hulle bemagtig om ‘n ander lief te hê, wie ‘n ander liefhet, wie ‘n ander liefhet, en so gaan dit aan. Jy is nodig. Ek pleit met die liggaam van Christus om waaksaam te bly en te onthou wat werklik saak maak. 1 Petrus 5:8 herinner ons duidelik:
“Wees nugter, wees wakker! Julle vyand, die duiwel, loop rond soos ‘n brullende leeu, op soek na iemand om te verslind.”
Ons is in ‘n intense stryd, besig om te veg vir ons lewens en die lewens van ander, en die liefde van God is al wat ons volkome kan genees. Die duiwel se enigste doel is om te steel, dood te maak en lewens te vernietig, maar Jesus het sy eie lewe vir almal gegee sodat elke persoon bewyse kan hê dat hulle geliefd is met ‘n ondenkbare en onvoorwaardelike liefde. Wanneer ons in Hom glo, kan ons verseker wees dat daar ‘n hoop groter as hierdie wêreld is, en dit hou ons aan die gang.
Geliefde, jy is deur God geskape met die doel om Syne te wees en om seer siele saam met Hom lief te hê. Daar is niemand soos jy nie; jy is uniek, en jy het ‘n identiteit wat nie afhanklik is van wat jy deurgemaak het of wat jy gedoen het nie. Ek weet die lewe is moeilik, maar ek is trots dat jy hier is, nog steeds besig om te baklei. Jy is nie ‘n las vir ander nie. Inteendeel, wanneer jy ander in jou stryd toelaat, sal jy vind dat stryd ons verbind en ons elkeen minder alleen maak. Jy is minder kwesbaar vir die vyand se leuens wanneer jy deur ander gelowiges omring word, en ek belowe dat daar medemense is wat in jou lewe wil wees. Ek bid dat God hulle op jou pad sal plaas, want ons het mekaar desperaat nodig terwyl ons op hierdie aarde wandel. Maar die waarheid is, jy word reeds omring en ondersteun, want Jesus is by jou, en Hy het jou nooit verlaat nie. Jy hoef nie langer deur die lewe te veg nie. God verlang daarna om saam met jou deur hierdie seisoen te stap en saam deur jou emosies te werk. Hy het jou lief meer as enigiets. Jy is so kosbaar vir Hom.
Ek bid dat jy gevul sal wees met goddelike moed om die duiwel te weerstaan “standvastig in die geloof. En moenie vergeet nie: dwarsdeur die wêreld moet julle medegelowiges dieselfde soort lyding verduur. God wat alle genade gee en wat julle geroep het om in Christus Jesus deel te hê aan sy ewige heerlikheid, sal julle, nadat julle ‘n kort tydjie gely het, self weer oprig en julle moedig, sterk en standvastig maak. Aan Hom behoort die krag tot in ewigheid! Amen” (1 Petrus 5:9–11). Laat ons mekaar innig liefhê, empatie hê met mekaar en mekaar vergewe. Ons weet nie die dag of die uur wat Christus sal terugkeer nie, daarom moet ons gereed wees. Hierdie lewe is te kort om van mekaar weg te hardloop. Ons het mekaar nodig. In oomblikke wanneer ons sterk is in die waarheid, laat ons ons broers en susters na die kruis dra; in die oomblikke wanneer ons die waarheid vergeet en nie langer kan staan nie, laat ons steun op diegene wat hul liefde vir ons bewys het. Laat ons vir mekaar veg, altyd, en wanneer ons oë van sy aangesig wegdwaal, laat ons mekaar herinner wat werklik saak maak.
Week 5 Uitdaging:
Neem hierdie week tyd om te bid vir Love God Greatly en ander sendingorganisasies wat regoor die wêreld dien. Terwyl ons hierdie week fokus om met ‘n missie te leef voor Jesus se koms, bid en ondersteun daardie organisasies wat uitreik na die wêreld om die evangelie tot aan die uithoeke van die aarde te versprei.
Week 5 Leesplan:
Week 5 Memoriseervers:
