Wag met Verwagting
Angela Perritt
In ons snelle kultuur is dit moeilik om te wag. Ons is gewoond daaraan om dít wat ons wil hê of dít wat ons nodig het, teen ‘n immer toenemende spoed te kry. Soms is kitskos net nie meer vinnig genoeg nie. Ons internetspoed is onmiddellik, nie meer die inbelwagtye van die verlede nie. Selfs om met ‘n geliefde te kan praat of te kommunikeer, hetsy in dieselfde dorp of regoor die wêreld, is amper onmiddellik. Niemand stuur meer persoonlike handgeskrewe briewe nie, want ons het ander maniere waarmee ons baie vinniger met mekaar kan kommunikeer.
Wag is iets waaraan ons nie gewoond is nie en iets waarmee baie van ons eerlikwaar nie baie goed is nie. Dis geen wonder dat so baie van ons sukkel wanneer ons bid en ons gou begin twyfel aan God wanneer ons gebede nie dadelik beantwoord word nie.
Maar ons moet onthou ons weë is nie noodwendig God se weë nie.
“U luister na my stem in die môre, Here, in die môre terwyl ek voor U verskyn en op U wag.” – Psalm 5:4
Ek is lief vir hierdie vers, want dit wys hoe bid en wag ons verhouding met God bou. Ons kom soggens na Hom toe, aan die begin van ons dag voor die dolheid van ons dag begin, en oorhandig ons dag aan Hom. Ons lê ons agenda, ons planne, ons bekommernis, ons hartseer, ons vreugde voor Hom neer; ons gee dit alles aan Hom en dan wag ons.
Ek weet wag is moeilik. Ons is nie gewoond daaraan nie en daarom is baie van ons nie goed daarmee nie. Maar daar is groei in die wag en baie keer word spesiale geskenke of seëninge gegee te midde van die wag, seëninge wat ons dalk sou gemis het as God so vinnig sou antwoord as wat ons wou hê.
Daarom wil ek jou aanmoedig om vasberade te wees om met verwagting op ons Here te wag terwyl jy uitsien na sy antwoorde op jou gebede. Moenie moed verloor nie. Hy het elke gebed gehoor en Hy werk in jou lewe op maniere wat jy nie eers op hierdie tydstip kan sien nie. Vertrou Hom in die wag, die tyd tussen jou gebede en sy antwoord. God is besig om te werk. Sy tydsberekening is perfek selfs wanneer ons voel dit is nie. Moenie hoop verloor nie. Streef na vreugde en die afwagting van sy antwoord.
Liewe vriendin, moet nooit vergeet dat God jou liefhet, jou sien en jou ken nie. Hy het ‘n wonderlike plan vir jou lewe, maar ek weet dit is moeilik om te verstaan as jy so lank gebid en gewag het. Ek wil graag vandag die tyd neem en vir jou bid. Ek glo om vir iemand te bid is een van die beste maniere om hulle waarlik lief te hê.
Liewe Heer,
Ek dra vandag my dierbare vriendin en suster in Christus aan U op. Ek weet U is lief vir haar, sien haar en het wonderlike planne vir haar lewe. Help haar asseblief om U en U werk vandag in haar lewe te sien. Bemoedig haar hart vandag met u waarheid en help haar om te weet dat U in haar lewe werk, selfs wanneer sy dit nie kan voel of sien nie. Help haar om nader aan U te groei terwyl sy op u antwoord wag. Bring haar begeertes en gebede in lyn met die planne en doelwitte wat U vir haar lewe het. Help haar in hierdie seisoen van wag en laat haar toe om te sien wanneer U uiteindelik antwoord, hoe die tydperk van wag werklik ‘n bedekte seën was.
Wees Heelhartig Lief Vir God,
Week 5 Uitdaging:
Maak hierdie week jou hart oop teenoor God in jou gebedstyd. Fokus op lofprysing, om dinge na God toe te bring en op belydenis. Dank Hom vir wat Hy in jou lewe doen, bely die sondes waarmee jy worstel en vra vir hulp in die areas van jou lewe waar jy leiding, krag of wysheid benodig.
Week 5 Memoriseervers:
