Ten Goede Verander
Deur Julie / 9 Desember 2020 / Ewige Verbond
My kinders het vroeër vanjaar vir my vertel dat as jy ‘n “pinky promise” breek (‘n belofte wat jy maak terwyl jou pinkie om ‘n ander persoon se pinkie gedraai is), dan sal jou pinkie afval! Dit is ‘n nuwe verwikkeling sedert ek jonk was, maar gelukkig vir hulle (en ons!) is dit nie waar nie.
‘n Verbond is ‘n formele ooreenkoms waar een of albei partye beloftes maak oor wat hulle gaan doen. In die Bybel het God verbonde gesluit met Abraham, Moses en Dawid, en nog ‘n paar ander. In hierdie verbonde het God Homself herhaaldelik daartoe verbind om hulle God te wees, en hulle (en hul nageslag) sou sy volk wees.
God se verbond met Abraham was om hom as vader van ‘n groot nasie te vestig en dat alle nasies deur sy saad geseën sou word. Deur Moses het God sy volk van slawerny verlos. Hy het ook ‘n ander verbond met hulle gesluit wat strukture van reg en verkeerd in plek gestel het vir God se volk terwyl hulle in die Beloofde Land woon. Dit het Abraham se nageslag as ‘n groot nasie gevestig. Die belangrikheid van gehoorsaamheid teenoor God word uiteengesit deur die seëninge en vloeke, met die doel dat sy volk ‘n getuie vir die ander nasies sou wees. Onder koning Dawid het God ‘n verbond met Dawid gesluit en belowe dat daar ‘n koning uit sy nageslag sou kom wie se troon ewig sou wees, Hy sal volmaak regeer en alle nasies sal deur Hom geseën word.
Terwyl God deurlopend getrou is aan sy volk in die Ou Testament, het God se volk nie daarin geslaag om volgens die verbondsvereistes en beloftes te leef nie. God se volk was herhaaldelik ontrou aan Hom.
Die profeet Jeremia, aangehaal in Hebreërs 8, het ‘n nuwe verbond voorspel wat nie op kliptafels geskryf sou word nie, maar op die harte en gedagtes van God se volk, ‘n transformerende verbond. Esegiël het ook die behoefte gesien dat harte deur God moes verander word (sien Esegiël 11:18-20 & 36:25-28). ‘n Volk wat Hom heelhartig liefhet met hulle hele wese, was God se begeerte van die skepping van Adam en Eva af.
Die ou verbond was goed, maar die wet het nie die mag om harte te transformeer nie. Deur die ou verbond moes daar herhaaldelik geoffer word, priesters en konings het gesterf, nuwe priesters en konings het hulle plek ingeneem, elkeen van hulle ook sondig. Die wet beklemtoon ons onvermoë om heilig te leef en ons behoefte aan redding deur die beloofde Messias. Ons kan nie ons kant van die verbond hou nie, ons verdien skeiding van God.
Gelukkig verander God die geskiedenis deur die persoon van Jesus, en alles verander! Jesus was die eerste persoon wat die ou verbond volmaak onderhou en nagekom het. Jesus het die nuwe verbond tydens die laaste avondmaal ingestel toe Hy gesê het: “Hierdie beker is die nuwe verbond, wat deur my bloed beseël is. Gebruik dit, elke keer as julle daaruit drink, tot my gedagtenis.” (1 Korintiërs 11:25).
Jesus het ‘n volmaakte lewe geleef volgens die wet en het gesterf as ons offer. Hy het drie dae later opgestaan en die mag van sonde en die dood verslaan. Sy eens en vir altyd offer aan die kruis het die offerstelsel vervul. Deur sy offer maak Hy ons heilig.
God gryp op hierdie manier in, sodat ons harte kan verander word deur die inwoning van die Heilige Gees, wat lewe bring. “Ons is immers die tempel van die lewende God. Dit is soos God gesê het: “Ek sal onder hulle woon en wandel, en Ek sal hulle God wees en hulle sal my volk wees.” (2 Korintiërs 6:16). Ons is nou in staat om God van harte te aanbid en te dien soos ons geskape is om te doen.
Ons verbond met God is ten goede verander deur Jesus. Ons is nie in staat om ons kant van die verbond te hou nie, daarom doen God dit vir ons! Hy maak ‘n nuwe verbond gebaseer op Jesus se dood en opstanding. Ons is bevry! Ons is deur Christus voldoende gemaak, Hy reinig ons en maak ons heilig. Die nuwe verbond is groter as die oue, want dit bied ons ‘n “ewige verlossing” (Hebreërs 9:12). God dink nie meer aan ons sondes nie en dit gee ons ‘n “ewige erfenis” (Hebreërs 9:15).
In Christus word ons harte van klip verwyder en vervang met harte van vlees. Ons word van die geestelike dood tot die lewe gebring deur die genadegawe van Jesus. Hy is die ewige Koning. Deur Hom word al die nasies van die aarde geseën. Jesus red, verlos en seën ons bo wat ons kan dink. In ruil daarvoor is ons uiters dankbare, heelhartige dienaars van die nuwe verbond.
U is ons God, ons is u volk.
“God wat vrede gee, het ons Here Jesus wat deur die bloed van die ewige verbond die groot Herder van sy kudde is, uit die dood teruggebring. Mag dié God julle toerus met alles wat goed is, sodat julle sy wil kan doen. Mag Hy deur Jesus Christus in ons tot stand bring wat vir Hom aanneemlik is. Aan Hom behoort die heerlikheid tot in alle ewigheid! Amen.” – Hebreërs 13:20-21
Julie
