Laat Vaar Jou Skuldgevoelens
Deur Kelli / 28 Oktober 2020 / Jesus, Ons Alles
Maar Christus het gekom as Hoëpriester van die weldade wat nou verwesenlik is. Hy dien in die verbondstent wat groter en volmaakter is en nie deur mense gemaak is nie, dit wil sê wat nie tot hierdie wêreld behoort nie. Met sy eie bloed en nie met dié van bokke en kalwers nie, het Hy net een maal die heiligdom binnegegaan en ‘n ewige verlossing tot stand gebring. Wanneer die bloed van bokke en bulle en die as van ‘n vers op die onreines gesprinkel word, maak dit hulle uiterlik rein. Hoeveel te meer sal die bloed van Christus ons gewete bevry van die las van dade wat tot die dood lei, sodat ons die lewende God kan dien! Hiervoor het Christus immers Homself as volkome offer deur die ewige Gees aan God geoffer. – Hebreërs 9:11-14
Ek hou van hoe die Here altyd ‘n beter manier het. Reg deur die Bybel kan ons telkens sien dat God, wanneer dinge op hulle donkerste lyk, altyd uitkoms gee. Op die een of ander manier. Ou maniere is nie noodwendig irrelevant nie. In hierdie geval was die ou maniere van die offerstelsel ‘n tydelike, onvolmaakte skaduwee wat na Jesus heen gewys het. Die ou manier is belangrik om te onthou. Selfs in ons eie lewens vandag het nuwe maniere, meer dikwels as nie, die geleentheid om beter maniere te wees – as ons nie die ou maniere vergeet nie. Die ou en nuwe werk saam.
Die Ou Verbond het nooit die sonde verwyder nie, maar dit eenvoudig bedek.
Dit was Jesus se vrywillige bloedoffer van “Ek lê my lewe af” wat alles verander het.
Jesus was nie net van buite skoon nie, maar innerlik vlekkeloos, wat Hom die perfekte Priester en die volmaakte, finale en volledige offer gemaak het om die Nuwe Verbond in te lei. Dit was van die begin af God se plan.
Hierdie Nuwe Verbond is beter as die Oue, omdat ons nie meer beperkte toegang tot God het nie. Nou het ons onbeperkte toegang. Ons het nie meer ‘n tydelike oplossing nie; ons het ‘n permanente oplossing vir ons sonde.
Maar daar is nog meer …
Jesus se bloed reinig nie net ons gewete nie, dit gee ons ook deurgaans die geleentheid om die lewende God te dien!
Dink ‘n oomblik na oor hierdie twee punte.
Dit was die bloed van Jesus wat ons gewete kon bereik en suiwer. Dit was vir geen ander persoon of dier moontlik om dit te bereik nie.
As jy enigsins soos ek is, dan verstaan jy hoe ‘n verlammende effek skuldgevoelens op jou kan hê. Dit kan ons laat stagneer. Die ‘ma-skuldgevoel’ het telkens ‘n manier om my te bekruip, dit klop aan my deur, veral tydens hierdie pandemie.
As enkelma met twee jong kinders, was dit regtig ‘n groot aanpassing om oornag ‘n ‘werk-van-die-huis-af’ en gedwonge tuisskoolma te word. Oorweldigend om die minste te sê. Dis asof ek gaan slaap het met een van daardie spieëls wat elke fout vergroot en my prestasie elke dag ontleed. Ek het tekort geskiet. Ons skiet almal tekort. Niemand van ons kom naby die plek waar ons God liefhet met elke vesel van ons wese, of om ons naaste lief te hê soos ons beveel word nie.
Ek pleit skuldig daaraan dat ek die leuen dat, as ek genoeg doen vir God, Hy my sal vergewe of meer gelukkig met my sal wees, glo. Ons gedagtes moet daagliks opgeskerp en vernuwe word, anders val ons in die strik van die eie-ek. Die enigste antwoord is die bloed van Christus. Waar gaan jy heen wanneer veroordeling na jou toe kom? Hebreërs 9:14 gee ons die antwoord: bekeer jou tot die bloed van Christus.
Ons redding en vergifnis het alles te doen met die bloed van Jesus. Ons is vergewe deur die genade van God en die bloed van Jesus Christus! Daarom staan ons vry om Hom te dien.
Om goedhartigheid, liefde, barmhartigheid, vrygewigheid, vergifnis en aanmoediging te bewys is alles tasbare maniere waarop ons die Here kan dien, ongeag die seisoen waarin ons verkeer. Christus se bloed is nie net gestort om ons gewete te reinig nie, maar dit het ons ook die geleentheid gebied om Hom te dien. Om met ‘n slegte gewete te dien, lei net tot dooie werke.
My gebed vir myself en vir jou is dat ons presies moet glo wat God oor Homself sê. Dat ons presies glo wat God oor sy Seun sê. Dat ons presies glo wat God gesê het oor die oplossing van ons sonde-probleem. Mag ons Jesus met ‘n skoon gewete en met ons hele hart vertrou en dien.
Wat ‘n eer is dit om met Christus saam te werk en deel te wees van ‘n groter verhaal as wat ons ooit kon bedink. Hierdie soort lewe en vryheid is die moeite werd om na te streef en daarvoor te veg.
Kelli
