Gekies
Ek sien haar in my geestesoog: ‘n onseker meisie wat plat skoene en ‘n helder neonhemp dra. Sy sit by ‘n lessenaar in ‘n stampvol klaskamer met ‘n lêer en hoop dat iemand haar nuwerwetse nuwe kapsel sal sien en sê dat sy oulik lyk. Haar maag is op ‘n knop en sy wens sy het in die somer net nog vyf kilogram verloor. Sy het ure in die winkelsentrum deurgebring om die perfekte uitrusting te vind soos sy die mooi meisie in die tydskrif gesien dra het.
Sy probeer te hard, en almal in die klaskamer kyk in ‘n ander rigting. Haar gedagtes is gevul met idees oor hoe om haarself reg te kry. Sy verlang om gesien, aanvaar en genooi te word vir die partytjie.
In haar pyn wil ek so graag die pouseerknoppie druk en vir my 16-jarige self laat weet dat dit goed sal gaan met haar.
Jy gaan regkom, meisie. Jy sal nie die matriekafskeidkoningin wees nie, en jy sal nie uitgenooi word na al die lekker partytjies nie, maar jy hoort. Jy is geliefd. Jy is spesiaal.
Vriendin, moenie dat die vyand van jou siel vir jou lieg en vir jou sê dat jy nie waardevol of belangrik is nie. Jy is die koninklike dogter van God. Jy is Syne.
Lank voordat jy gebore is, het jou hemelse Vader jou gekies. Toe Hy elke ster in die lug geplaas het en die oseaan geskep het, het Hy besluit om ‘n bietjie ekstra by te voeg aan sy pragtige meesterstuk. Hy het jou met ‘n vonkel in sy liefdevolle oog ontwerp en was vasbeslote dat jy op hierdie aarde geplaas sal word om sy naam te dra en sy goedheid en majesteit aan die kykende wêreld te verkondig.
Daardie partytjie waarna die gewildste meisie in die klas jou nie uitgenooi het nie, verbleek in vergelyking met die wonderlike doel wat God vir jou lewe ontwerp het. God het groter planne vir jou. Jy is moontlik nie in die ‘gewilde groep’ hier op aarde nie, maar Christus berei vir jou ‘n plek in die hemel voor. Die Koning van die heelal neem jou doelbewus in ag en neem kennis van elke detail van jou lewe. Op hierdie oomblik sit jou Verlosser aan die regterhand van die Almagtige God en pleit namens jou. As deel van sy koninklike priesterskap het jy volle toegang tot die goddelike oor van die Heerser van die hele skepping.
Die Lig van die wêreld woon in jou, en jou klein liggie skyn helder vir sy heerlikheid in hierdie donker wêreld. Wanneer jy opkyk en ‘n ster in die lug sien, onthou dat God jou sien. Jy is geliefd, begunstig en afgesonder as heilig deur God die Almagtige.
Jy mag miskien nooit die mees gewilde klere dra nie, maar jy kan sy vriendelikheid, liefde en goedheid in ‘n donker wêreld laat sien. Jy het ‘n opvallende ooreenkoms met die God van verlossing. God het jou uitgesonder om hierdie wêreld te wys dat niemand wat Christus as die Here bely ooit verwerp word nie, omdat Jesus vlees geword het om ons almal van sonde en skaamte te red. Redding is hier.
Meisie, sit regop en glimlag. Jesus het jou vir ewig vrygemaak van die behoefte om in te pas by dít wat vir die wêreld belangrik is. In Christus ontvang ons aanvaarding en ons kan sy volheid van blydskap en oorvloedige lewe ervaar, waar ons ookal is.
Oral rondom jou is daar gebroke mense wat steeds verlore is in die gebrokenheid van sonde. God het jou gekies om almal wat jy ontmoet na die wonderlike lig van ons Verlosser te wys.
