Gebroke en Genesing
Grace Ann Hopkins
Somtyds voel ek asof daar geen hoop vir ‘n beter môre is nie. Daar is so baie wat gebroke is en daar is soveel wat seer het. Gewoonlik, in hierdie oomblikke, sit ek met meer vrae as antwoorde. In hierdie oomblikke voel ek wat dit beteken om mens te wees. Een van die vrae wat ek myself al afgevra het is: Is daar ‘n volkome waarheid? Is die Woord van God die basis van dit wat waar is? In ‘n wêreld wat sê sonde is nie ‘n realiteit nie en dat ons self moet kies wat die waarheid is, is dit so moeilik om die waarheid van leuens te onderskei.
Sonder onbetwisbare waarheid is die wêreld in ‘n toestand van chaos. Ons almal was al getuies hiervan. Maar ons weet dat daar ‘n volkome waarheid moet wees, want ons sien dit in alledaagse gebeure, soos die swaartekrag wat nodig is om te verhoed dat ons die ruimte in dryf. Hierdie eenvoudige feit waaroor ons almal kan saamstem, beteken dat daar ‘n waarheid is wat moet seëvier.
Toe Jesus die aarde bewandel het, het Hy beweer dat Hy die Weg, die Waarheid en die Lewe is (Johannes 14:6). As ons kies om sy woorde te glo, beteken dit dat Hy die skrywer van waarheid is en die enigste weg na oorvloedige en ewige lewe. Daar is ‘n oorvloed van wetenskaplike bewyse vir Jesus se bestaan – Sy lewe, dood, begrafnis en opstanding – en vir die akkuraatheid van die Woord van God. As gelowiges werk ons egter ook vanuit geloof aangesien ons goddelike krag ervaar wat nie gesien of selfs verklaar kan word nie.
Alhoewel dit moeilik is om op te staan vir die waarheid in ‘n kultuur wat diegene onderdruk wat nie saamstem met sy ideologieë nie, moet ons weet dat ons totale waarheid in die Woord van God vind. Wanneer pyn God afwesig en onwerklik laat lyk, kan ons sy Woord vertrou, want ons weet dit is die waarheid wat tot vrede lei; ons het dit ervaar.
Die kragtigste ding wat ek die afgelope tyd geleer het, is dat jy nie met iemand hoef saam te stem om hulle lief te hê nie; ware liefde word in alle omstandighede verduur. As gelowiges kan ons ‘n vaste kern van waarheid en ‘n teer liefde hê vir alle mense, ongeag hulle geloof. Ons word die beste luisteraars en lojale liefhebbers soos Jesus vir ons gedemonstreer het.
Oor die laaste paar jaar het ek geleer dat dit nie verkeerd is om my opregte menslike emosies te erken, moeilike vrae te vra en twyfel te erken nie. Ek kan twyfel en geloof hê. Ek verkies om eerlik te wees oor hierdie dinge, want menslike emosie is ‘n werklikheid en as ons nie eerlik is oor ons gevoelens nie, sal ons net verder van die waarheid af beweeg. Ek het al gesien hoe dit bewys is: ons emosies is ‘n weg vir ‘n dieper verbintenis met God en met ander. Vir my is dit dalk ‘n seisoen van minder woorde, maar dit is ook ‘n seisoen van meer versekering – meer oomblikke in God se arms, waar ek daaraan herinner word dat ek Hom desperaat nodig het, dat Hy weet wat ek nodig het en dat Hy vir my intree in smeekbede wat nie in woorde uitgedruk kan word nie.
Alhoewel ek dalk nie volle genesing op aarde sal sien nie en nooit sal verstaan waar God in sekere situasies is nie, moet ek glo dat God vir elke mens op hierdie aarde omgee, want Hy het sy Seun gestuur om vir ons almal te sterf sodat ons nie vir die verderf bestem sal wees nie, maar vir die ewige lewe wanneer ons in Hom glo. Dit is wat my laat leef en baklei en liefhê.
Ek weet dat Jesus binnekort vir ons sal terugkom. Tot dan is Hy met ons en ons almal kan gebroke wees en terselfdertyd genees word. Ons kan swaarkry en ons kan lewe. Ons kan die verlossing van ons verlede en huidige pyn ervaar terwyl ons wag vir volle genesing en herstel in die hemel. Soos Jesaja 35 dit so mooi stel, is die Here besig om ‘n plek voor te berei vir diegene wat in Hom glo. In hierdie plek sal hulle “altyd straal van blydskap, hulle sal vol vreugde en blydskap wees; ellende en smart sal verdwyn.” Kan jy jou hierdie dag indink? Dit bring my tot trane as ek net daaraan dink. Mag jy vir ewig vashou aan hierdie hoop, dit met ander deel en weet dat daar nog gelowiges regoor die wêreld is wat veg vir hierdie selfde waarheid en vasklou aan dieselfde hoop. Hou goeie moed. Jy is nooit alleen nie.
