Ek hou daarvan dat ons God se hart vir die nederiges en opregtes deur die hele Skrif kan sien. Sy strewe na alle mense word van die begin tot die einde vertoon, maar in Lukas 2 is daar iets skouspelagtig wat plaasvind wat ons nie wil mis nie.
Kom ons draai eers ons gedagtes na hoe herders in daardie tydperk sou gewees het. Hulle sou vuil wees, nie lekker ruik nie en as die laagste in die werkersklas beskou word. Hulle was moontlik selfs tieners wat niks besit en niks gehad het nie.
Met hierdie insig, dat Hemelse wesens opdaag voor hierdie onbeduidende werkersklaskinders, vir een van die eerste proklamasies van die geboorte van die Verlosser wat aan hierdie “niemands van nêrens” af gemaak is, sê vir ons iets buitengewoons oor God se plan en hart teenoor alle mense,
Hoekom maak dit saak?
Die geboorte van Jesus, die ewige geskenk van God se teenwoordigheid, vergifnis en redding, was nie net vir die priesterlike en ryk klas nie, maar dit is vir almal. Dit is veral vir die armes, die laagste klas en kinders. Lukas skryf: “Toe sê die engel vir hulle: Moenie bang wees nie, want kyk, ek bring vir julle ‘n goeie tyding van groot blydskap wat vir die hele volk bestem is.” (Lukas 2:10).
Ek kan my net indink hoe hierdie oomblik hul lewens verander het. Ons weet die herders moes tekens van vrees getoon het omdat die engel hul vrees aangespreek het, maar ek glo hul vrees was ook gepaard met ontsag en verwondering toe die engele opdaag en sing!
Van sing gepraat, het jy al ooit gevind dat jy ‘n liedjie neurie wat jy nie uit jou kop kan kry nie? Om die waarheid te sê, jy onthou nie eers waar jy dit gehoor het nie! Ek sal erken, dit gebeur gereeld met my. Ek sal lukraak ‘n liedjie begin sing en my kinders sal my herinner dat die liedjie gespeel het by ‘n winkel waar ons vroeër die dag was. Ek wonder of die skaapwagters ooit die melodie vergeet het wat die engele gesing het toe hulle die aand in die veld opgedaag het – die aand wat hul lewe vir ewig verander het.
Ek kan my indink dat die skaapwagters nooit iets van daardie nag vergeet het nie. Die God van die heelal het hulle nie net gesien nie, maar Hy het tyd geneem om GOEIE NUUS te bring, selfs vir hulle. Die verhale wat hulle van daardie oomblik af vertel het, het beslis geslagte beïnvloed. Die evangelie verander lewens en ons het almal ‘n rol om te speel om die verhaal te vertel.
Die Here is so deernisvol. Hy sien die verstotenes, die eensames en die gebrokenes van hart. ‘n Vader vir weeskinders en ‘n beskermer van die reg van weduwees is God in sy heilige woning (Psalm 68:6).
Die Kersseisoen kan vir baie mense met beide vreugde en hartseer gevul wees. Ek was al daar. Ek weet hoe dit voel. My hoop is dat hierdie herdersverhaal wat jy dalk jou hele lewe gehoor het, hierdie jaar ‘n ander betekenis vir jou het. Hierdie Skrifgedeelte is jou herinnering dat jy saak maak en jy behoort. Wanneer ander uitstap, stap God in. God kom na ons toe. Hy het na die herders gekom waar hulle was en Hy doen dieselfde vandag vir jou en my.
Die liedjies van Kersfees herinner ons daaraan dat Jesus vir elkeen van ons is. Ons is uitverkies en gered en ons hoop word in Hom gevind. Ons het dit nie verdien nie. Dit is ‘n geskenk.
So wat sal jy met hierdie geskenk doen?
Kan ek ons almal aanmoedig om met vrymoedigheid vir Christus te lewe en te glo dat ons ‘n impak kan hê op toekomstige geslagte? Ons het elkeen ‘n rol om te speel. ‘n God-verhaal om te vertel. ‘n Lied om te sing.
Elke knie sal buig. Jesus is Koning!
