Dinsdag – Om die mensdom te verlos
deur Angela | Desember 5, 2018 | Verlosser – Die Belofte Vervul
“Maar toe die tyd wat God daarvoor bepaal het, aangebreek het, het Hy sy Seun gestuur. Hy is uit ‘n vrou gebore en van sy geboorte af was Hy aan die wet onderworpe om ons, wat aan die wet onderworpe was, los te koop sodat ons as kinders van God aangeneem kon word.” Galasiërs 4:4-5
Kom ons leer vandag twee terme wat ons baie gebruik, maar nie altyd heeltemal verstaan nie: verlossing en aanneming.
Die woord verlossing beteken “om los te koop.” Die term is spesifiek gebruik met verwysing na die koop van ‘n slaaf se vryheid. Die toepassing van hierdie term op Christus se Kruisdood is kragtig. As ons “verlos” is, is ons vorige toestand een van slawerny. God het ons vryheid gekoop, en ons is nie meer slawe van die sonde of die Ou Testamentiese wet nie. Jesus het die prys betaal vir ons vrylating van sonde en die gevolge daarvan. Sy dood was ‘n ruiling vir ons lewens. Trouens, die Skrif is duidelik dat verlossing slegs moontlik is “deur sy bloed”, dit wil sê deur Jesus se dood (Kolossense 1:14).
Wanneer ons die evangelie hoor, ons sondes bely, en ons geloof en vertroue plaas in Jesus Christus, word ons op daardie oomblik in God se koninkryk gebore. Ons word aangeneem as sy kinders en word vir ewig erfgename saam met God. (Romeine 8:14-17).
Ons is vrygemaak. Ons is erfgename.
Hierdie twee begrippe behoort die manier waarop ons leef te beïnvloed. Leef ons asof ons vry is van sonde? Of is ons steeds slawe daarvan? Leef ons as erfgename? As dogters met regte en verpligtinge binne die familie van Christus? Of leef ons soos ons wil, maar probeer om die erfenis steeds te geniet? Kom ons kyk vandag of ons harte en gedagtes deurweek is met hierdie twee konsepte en kom ons maak hulle deel van ons Kersfeesvieringe.
Almagtige God, ek weet dat ek u dogter is – U, die Here van die Here en Koning van die Konings. Help my om elke dag as u aangenome dogter te leef. Help my om te onthou dat my verlossing teen die groot prys van ‘n glorieryke uitruiling gekom het. Amen.
Mini uitdaging: Maak die Kruis ‘n deel van jou Kersfeesversierings deur takke, hout, papier, gare te gebruik … enigiets wat jy kan vind en in jou huis tentoonstel.
