Glo
Deur Ebos / 3 Maart 2021 / Markus
Toe staan Hy op, bestraf die wind en sê vir die see: “Hou op! Bedaar!” Die wind het gaan lê en daar het ‘n groot stilte gekom. Toe sê Hy vir hulle: “Waarom is julle bang? Het julle dan nie geloof nie? ”Hulle is met groot ontsag vervul en het vir mekaar gesê: “Wie kan Hy tog wees dat selfs die wind en die see Hom gehoorsaam?” – Markus 4 :39-41
Wie kan Hy tog wees?
Hierdie vraag raak my hart op verskillende maniere. Eerstens het die dissipels hierdie vraag gevra. Hulle het sekerlik geweet wie Jesus was. Regtig! Hy was nou al ‘n ruk lank by hulle en hulle het Hom al verskeie wonderwerke sien doen. Waarom vra wie Hy is?
Hierdie gedagte het by my opgekom: ons ondervind omstandighede en haglike situasies van die lewe en ons kom op ons laagste punt, en skielik kom God en doen ‘n groot wonderwerk. Hy doen dit vir ons, nie omdat ons gebid het nie – ons het dalk geen geloof gehad nie – en soos die dissipels, het ons miskien gehuil en gekla en in selfbejammering verval. Maar as gevolg van wie Hy is, kom Hy en draai dinge om asof dit nooit erg was nie.
Laat my dus toe, as ek mag, om hierdie vraag te beantwoord en, in die proses, jou weer aan Hom voor te stel.
Hy is die Koning van konings.
Die Skepper, Besitter, Onderhouer en Eienaar van die hemel en die aarde en alles daarin.
Hy is die Een wat alles gemaak het en na wie alles en almal luister.
Hy is die Een vir wie niks te moeilik is om te doen nie.
Hy is die Een wat nooit misluk nie en wat nie kan misluk nie.
Hy is barmhartig, goedhartig, lankmoedig en oorvloedig in liefde.
Hy is dieselfde gister, vandag en tot in ewigheid.
Die Een wat die hele heelal in Sy hande hou.
Die Een vir wie niks verwar of wat nie onverhoeds betrap word nie.
Die Een wat die aantal hare op jou kop ken.
Hy is Jesus, die Koning van konings en Here van here. Die Een vir wie die dood nie gevange kon hou nie.
Die Een wat jou so liefgehad en lief het dat Hy sy lewe vir jou gegee het sodat niemand, geen mag, nie eers Satan, ‘n eis op jou kan lê nie.
Die einste Een wat in staat is om elke storm in jou lewe te kalmeer, jou te beskerm en te bewaar totdat Hy terugkom.
Dit, en baie meer, is wie Jesus is.
So, liewe vriend, wat moet ons antwoord hierop wees?
GLO!
Ja, glo! Vertrou hom! Hy is te getrou om te misluk. God is nie ‘n persoon dat Hy van plan moet verander nie. As God dit gesê het, sal Hy dit doen. Hy is te konsekwent om jou halfpad te verlaat. God is te toegewyd aan jou om jou te midde van jou storms te verlaat.
Glo! Geliefdes, vertrou op Hom! Ek moedig jou aan!
Ek glo, HERE, help my ongeloof.
Ebos
