Geloof wat werk

deur Andrea | Februarie 2, 2018 | Jakobus

 

Wat ons doen, sê baie oor wat ons sê ons glo. Soos die spreekwoord lui: “daar lê baie myle tussen doen en sê”. “Dit is redelik maklik om te sê ons het geloof in ons harte, maar as daardie geloof nie tot uiting kom deur goeie dade of as mense nie die vrug in ons lewens kan sien nie, is dit regtig ware geloof?

Wat ons in ons harte glo, moet duidelik blyk uit die manier waarop ons ons lewens lei. Terwyl ons in ons harte in God glo en wil doen wat Hom behaag, is dit die bewyse en vrug wat voortspruit uit hoe ons leef, praat en wat ons doen wat die geloofwaardigheid van ons geloof toon.

Ek glo dit is waarom Jakobus die punt in Jakobus 2:14-26 maak dat dit nie veel help as ons daarop aanspraak maak dat ons geloof het en gelowiges in God is, as ons nie ook die woord by die daad sit in die uitleef van ons geloof en doen wat God ons beveel het in sy Woord nie.

Soos Jakobus in Jakobus 2:17 (’83 vertaling) sê, “So gaan dit ook met die geloof: as dit nie tot dade oorgaan nie (werke en aksies van gehoorsaamheid wat as bewys dien), is dit sonder meer dood. (betekenisloos)”

God leer ons dat ons geloof lewendig word en groei in krag deur die Gees soos ons dit uitleef in ons lewens. Dit is soos om ‘n gehoorsame hart te kweek, liefdevol, een wat na ander se behoeftes omsien, om die regte ding te doen, selfs wanneer dit nie maklik of gerieflik is nie, en om die liefde, genade en barmhartigheid van Jesus aan mense in ons wêreld te betoon.

Soos ons deur die lewe gaan, sal ons baie situasies of behoeftes raaksien wat ons die geleentheid bied om ons geloof in aksie te laat oorgaan. En in daardie oomblikke wil God hê dat ons moet groei en volwasse wees, sodat ons geloof nie net ‘n regmerkie is wat ons ewige bestemming verseker nie, maar ons die geleentheid gee om ‘n lewende, kosbare, pragtige, vrugdraende beeld van God se getrouheid, genade, liefde en krag te wees vir ander om te sien.

Wanneer ons in gehoorsaamheid uitreik na ander in liefde en genade en hulp verleen aan iemand in nood, wanneer ons die regte ding doen, voer ons God se opdrag in sy Woord uit. En elke keer as ons dit doen, blaas dit die vlam van geloof in ons aan, wanneer ons sien hoe God werk deur ons eenvoudige dade van gehoorsaamheid. Dis dan wanneer dit nie meer net ‘n teorie of ‘n goeie idee vir ander is nie, maar dit begin vrug oplewer in ons lewens en dit bou en versterk ons geloof.

Ons hoef ons nie te bekommer daaroor om onsself aan Jesus te bewys nie – Hy sien ons harte, en Hy is getrou om langs ons te loop soos ons groei en leer. Hy verwag nie van ons om ewe skielik ‘n klomp goeie werke te doen om ‘goed genoeg’ te wees, verlossing te verdien of in Sy ‘goeie boekies’ te bly nie. Die soort goeie werke waarvoor ons geroep is, is dié wat aan die buitekant getuig van die geloof wat binne-in ons is.

Die meeste van die tyd maak God dit vir ons baie maklik, maar dit vereis wel dat ons iets moet doen van ons kant af. Dit mag wees dat God ons vra om iemand te help wat ‘n behoefte het, in plaas daarvan om hulle te systap wanneer dit in ons vermoë en krag is om hulle te help. (Vir ‘n goeie voorbeeld hiervan lees die verhaal die barmhartige Samaritaan in Lukas 10: 25-37.)

As ons kan leer om die geleenthede wat oor ons pad kom, te sien, nie net as ‘n geleentheid om ‘n goeie daad te verrig nie, maar ook as ‘n belangrike manier om ons geloof te versterk en te bou, sal ons begin om buitengewone wonderwerke in ons tyd te sien.  Dinge wat ons nooit sou gedink het God in en deur ons kon doen nie. Ons geloof sal sterker word, nie omdat ons optrede die verskil maak nie, maar omdat God in sy krag deur ons geloof optree en ‘n magtige werk deur ons doen, vir ons eie beswil, tot voordeel van ander en tot Sy verheerliking.

Ek hou van die geloofshoofstuk in Hebreërs (11) omdat ons sien hoe so baie helde in die Bybel, wat deur die geloof geleef het en God se bevele gehoorsaam het, as gevolg daarvan groot wonderwerke aanskou het.

Soos ons groei en leer om dieselfde te doen, sal ons wees soos diegene wat “deur dade van geloof, koninkryke verower het, die reg van God gehandhaaf en verkry wat God beloof het … (Heb 11:33).

Ek glo dat ons almal daardie soort geloof wil ervaar, en ons kan groei deur die krag van Sy Gees wat in en deur ons werksaam is, in Jesus se naam.

Met liefde,

 

 

 

 

 

Andrea Howey is ‘n “hand lettering artist” van Dallas, Texas. Sy gebruik “hand lettering” om dit wat in haar hart lewe en die boodskap van hoop, waarheid en geloof in die Woord van God te deel. Haar doel is om mense in hulle harte aan te moedig, hulle geloof te versterk, en bo alles, om mense te lei tot op ‘n plek waar hulle Hom leer ken op ‘n persoonlike en intieme vlak.

Jy kan Andrea en haar pragtige handgeskrewe woorde van aanmoediging op Instagram vind: @andrearhowey.

Leave a Reply

Your email address will not be published. Required fields are marked *

Verwante Bybelstudie

KRY BLOG-UPDATES

Mees onlangse