As Die Here Wil

Deur SaraLindsey | Februarie 12, 2018 | Jakobus

Ek het hierdie blog twee dae na Kersfees begin skryf, op ‘n ysige Wes-Texas oggend, terwyl ek langs die kant van ‘n snelweg gesit het. Ons het net klaar hulp verleen by twee verskillende ongelukke wat ons sien gebeur het.

Die verse het in my gedagtes gebly – en my weer nederig gemaak – soos ek langs die bed gesit het van een van my eerste familievriende wat op 35 sterwend aan kanker was.

Niemand is seker dat môre gaan kom nie. Dit is iets wat ons weet, reg? Ons weet dit, maar ons glo dit so dikwels nie totdat iets tragies gebeur. Totdat daardie vragmotors in stadige aksie reg voor ons omkantel. Totdat iemand wat ons liefhet, onverwags sterf. Totdat iets ondenkbaar, werklikheid word.

As ek eerlik moet wees, is daar ‘n gebroke deel van my wat angs en vrees laat kop uitsteek wanneer ek dink aan die onsekerheid van die lewe. Ek wil my kinders sien grootword. Ek wil dekades lank saam met my wederhelf spandeer. Ek hou daarvan om te beplan. Ek hou daarvan om in beheer te voel.

Vandag se verse sê, “Julle wat nie eers weet hoe julle lewe môre sal wees nie! Julle is maar ‘n damp wat ‘n oomblik verskyn en sommer weer verdwyn. “Jakobus 4:14

Hierdie is ‘n gedagte wat telkens in die Skrif herhaal word.

“Daarom sê Ek vir julle: Moet julle nie bekommer oor julle . . . . wie van julle kan deur hom te bekommer sy lewe met een enkele uur verleng? . . . Moet julle dus nie oor môre bekommer nie, want môre bring sy eie bekommernis.” Matteus 6: 25-34

“Moenie roem oor wat jy môre verwag nie; jy weet nie wat die dag sal oplewer nie.” Spreuke 27: 1

Hierdie instruksies word in Jakobus gegee in die konteks van sakemanne wat beplan om te reis en geld in ander stede te maak. Maar die punt is nie spesifiek oor besigheid of geld of dood nie.  Jakobus se woorde spreek die gesindheid van ons gedagtes en die neiging van ons harte soos ons deur hierdie wêreld reis, aan.

Dit is arrogant en trots (“verkeerd” volgens Jakobus 4:16) om aan te neem dat ons in beheer is van die skryf van ons lewensverhale of om aan te neem dat ons met die uiteinde bekend is. Ons moet ons lewens en verwagtinge in eerbied en nederige gehoorsaamheid aan God se soewereiniteit wy.

Hierdie les gaan daaroor om waarlik in ons harte en gedagtes te glo – en met ons monde te bely – dat God in beheer is. Hy bepaal ons dae. Hy besluit hoe die besonderhede van ons individuele lewens inpas by die algehele plan vir die mensdom. En ten spyte van my aanvanklike huiwering oor die onsekerheid, is daar iets bevrydends hierin. Ek is nie in beheer nie – en dit is ‘n goeie ding. Ek verslaap en verbrand die roosterbrood en vergeet en verloor my humeur. Ek dank die Heer dat Hy hierdie hele gemors onder beheer het (selfs wanneer dit soos ‘n gemors voel).

Dit beteken nie dit is verkeerd is om te beplan of om geld te maak nie.

Dit beteken nie dit is verkeerd is om groot ambisies te hê of om God in gebed te smeek nie.

Dit beteken nie dat ons lukrake, onverantwoordelike swerwers moet wees nie.

Dit beteken dat ons die waarhede van God se soewereiniteit in die kern van ons wese moet behou. Dit moet ons gedagtes oorheers en uitvloei deur ons woorde.

As die Here wil.  As die Here wil.  As die Here wil.

Paulus het dit vir ons gedemonstreer toe hy gesê het: “Maar binnekort sal ek na julle toe kom, as die Here wil,” in 1 Korintiërs 4:19 en toe hy gesê het: “As God wil, kom ek na julle toe terug.” in Handelinge 18:21.

Hierdie woorde kom op ‘n goeie tyd vir my as ek dink oor die vars begin van ‘n nuwe jaar en alles wat ek hoop om te bereik. Ek bid dat my lewe ‘n knielende houding sal inneem, – nie net letterlik wanneer ek bid nie, maar ook simbolies wanneer ek planne maak en wanneer ek praat. Ons leef in ‘n eiegeregtige kultuur wat ons leer om op ons agtervoete te staan, maar ek bid dat mense deur my lewe sal sien watter groot eer dit is om ons Koning te dien deur te kniel en onder alle omstandighede onderdanig te wees.

Kom ons onderneem om ons gedagtes te rig en ons harte te fokus op God se wil. En kom ons kom saam by die voet van die Kruis in aanbidding en nederige gehoorsaamheid.

“Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.” Filippense 4: 6-7

Deur God se genade gaan ek. En, as die Here wil, lê daar vir ons baie groei en avonture voor hierdie jaar.

Genade en vrede,

 

 

 

 

 

Sara is ‘n Wes-Texas-meisie, wat tans buite Dallas woon. Sy bewonder haar man van 14+ jaar en geniet die daaglikse chaos wat gepaard gaan met die grootmaak en opvoeding van hulle 3 jong dogters. Sy is ook ‘n dokter wat spesialiseer in MRI’s.

Sara is ‘n bemoedigende vriendin, wat daarop uit is om ware verhoudings te bou. Sy het ‘n hart vir die ondersteuning van vroue en gesinne, en sy is passievol oor Bybelvertaling.

Week 4 Uitdaging: Moenie vir môre wag nie, aan wie moet jy vandag uitreik en laat weet hoe lief jy vir hulle is? In plaas daarvan om vir volgende week, maand of jaar te wag … watter veranderinge het jy nodig om vandag te maak om jou lewe vir God te begin in plaas van vir jouself? Moenie jou gehoorsaamheid vertraag aan wat God jou roep om te doen nie … begin vandag

Week 4 Leesplan

 Week 4 Memoriseervers

 

 

Leave a Reply

Your email address will not be published. Required fields are marked *

Verwante Bybelstudie

KRY BLOG-UPDATES

Mees onlangse